حلول للدوخة و الغثيان الصباحي

#من أكتر المشاكل اللي بتواجة #الست الحامل في أول الحمل #الغثيان أو بالبلدي "غممان النفس"..

ودي بتختلف من حد للتاني.. فيه ناس مش بتحس بيها أصلا، وفيه ناس تانية بتحس بيها بدرجة متوسطة وناس بيكون مأثر عليهم لدرجة إنها مش مستحملة ريحة أي حاجة وواخدة إقامة في الحمام يا عيني عشان بطنها مقلوبة.. كمان ممكن يستمر الغثيان طول 9 شهور الحمل مش شرط أول 3 شهور بس.. انتي وحظك..

دي شوية حاجات ممكن تخفف الموضوع شوية..

ماتقوميش من السرير على طول الصبح.. خدي وقتك وقومي بالراحة عشان ماتدوخيش..

خلّي جنب سرير بسكوت مملح كلي منه أول ما تفتحي عينك الصبح..

افطري كويس.. المعدة الفاضية بتزود الغثيان..

ريحة اللمون أو البرتقال ممكن تهدي جامد.. فاكرة كويس قوي اني استلفت من حماتي كمامات (هي دكتورة سنان) وكنت باحط فيها قشر برتقان عشان أعرف اقف في المطبخ .. هيييح عذابات المرأة المعاصرة!

الجنزبيل كويس.. اغلي منه شوية واشربيهم قبل النوم.. يستحسن الطازة منه.. أنا مكانش بيجيب معايا نتيجة الصراحة!.. بس الدكاترة بينصحوا بيه... وممكن يجيب معاكي نتيجة..

مصي مكعبات تلج... هاتقلل الغثيان..

الخس الكابوتشا هايل للغثيان والحموضة..

بلاش وجبات دسمة أو مليانة دهون..

كلي على فترات.. يعني وجبات صغيرة على مدار اليوم.. ماتكبسيهاش مرة واحدة عشان معدتك ماتتعبش..

البسي هدوم واسعة بحيث ماتضغطش جامد على بطنك..

الحركة الكتير بتزود الغثيان.. ريحي كل ما تقدري..

اغسلي اسنانك باستمرار.. احساس الفم المنتعش الفريش الحلو ده هايقلل العثيان..

آسألي الدكتور عن علاج للغثيان وماتاخديش أي أدوية غير بموافقته

تحت قسم: صحتك بالدنيا

شارك اصدقائك |

Advertisements

ADV

ADV